അനിമേഷൻ സ്വന്തമായി പഠിക്കാൻ സാധിക്കുമോ ?

അനിമേഷൻ സ്വന്തമായി പഠിക്കാൻ സാധിക്കുമോ ?

ഇത് ഒരു സുപ്രധാനമായ ഒരു ചോദ്യമാണ്. ഒരു മനുഷ്യന് എന്തും സാധ്യമാണ് എന്നാണ് പൊതുവേ പറയാറുള്ളത്. അത് സത്യമാണ് എന്ന് തെളിയിക്കപ്പെട്ടിട്ടുണ്ട്.ഇന്നത്തെ സാഹചര്യത്തിൽ എന്തും സ്വായത്തമാക്കാനുള്ള സാഹചര്യം വളരെ കൂടുതലാണ്.പഠനം എന്നത് ഒരാളിൻറെ മാനസിക നിലവാരത്തെ അനുസരിച്ചാണ് നിലകൊള്ളുന്നത്.

   

 അനിമേഷൻ,ആർട്ട് എന്നിവ പഠിക്കുകയെന്നത് വളരെയധികം ശ്രദ്ധയും ലക്ഷ്യബോധവും ചേർന്ന ഒന്നാണ്. ഇന്ന് ഈ വ്യവസായത്തിൽ വിജയം കൈവരിച്ച എല്ലാപേരും കടന്നു വന്ന പരിശീലന രീതികൾ നമുക്ക് മുന്നിൽ മാതൃകയായി നിൽക്കുന്നു.ഇതെല്ലാം എങ്ങിനെ സംഭവിക്കുന്നു എന്നത് ,അതിനെ സമീപിക്കുന്ന രീതിയെ അനുസരിച്ചാണ് വ്യാഖ്യാനിക്കപ്പെടുന്നത്.എന്ത് ലക്ഷ്യത്തോടെ ആണ് ഇതിലേക്കു വരുന്നത് എന്നത് വളരെ പ്രധാനമായ ഒന്നാണ്.

    അനിമേഷൻ അല്ലെങ്കിൽ ആർട്ട് മേഖലയിലേക്ക് കടന്നു വരാൻ ഒരാളിനെ ആവേശം കൊള്ളിച്ചത് എന്താണ് എന്നത് അന്വേഷിക്കുമ്പോൾ അത് അയാളെ സ്വാധീനിച്ച എതോ ഒരു സൃഷ്ടി ആണ് എന്ന കാര്യം ഉറപ്പാണ്.അതായത് ഒരു ചിത്രം, സിനിമ, കാർട്ടുൺ ,പ്രസൻറേഷൻ ,ടി.വി പ്രോഗ്രാം അങ്ങിനെയുള്ള എന്തെങ്കിലും ആയിരിക്കാം ഇവിടെ കാരണമായി വന്നത്.

 

  ഈ വിദ്യ പഠിക്കാൻ ആഗ്രഹിക്കുന്നവർ ഇതിൻറെ ഘടനയെപ്പറ്റി ആദ്യം ഒരു ധാരണ ഉണ്ടാക്കേണ്ടത് ആത്യാവശ്യമാണ്.അതായത് ഇതിൽ എന്തൊക്കെ ചെയ്യുവാൻ സാധിക്കും,ഇതിൻറെ പരിമിതികൾ എന്തൊക്കെയാണ്,എന്തൊക്കെ സംവിധാനങ്ങൾ വേണം,ഇതിനു വേണ്ടി വരുന്ന സമയം എത്രയാണ് തുടങ്ങിയ കാര്യങ്ങളെക്കുറിച്ച് വളരെ വ്യക്തമായ വിവരം ഉണ്ടാക്കിയെടുക്കണം.

    ഇനി വേണ്ടത് ഒരു ഫ്രെയിം വർക്ക് ഉണ്ടാക്കുക എന്നതാണ്.ഉദ്ദേശിക്കുന്ന വിഷയത്തിൽ എന്തൊക്കെ കാര്യങ്ങളാണ് പ്രധാനമായും ശ്രദ്ദിക്കേണ്ടത് എന്നിവ ആദ്യം വിലയിരുത്തുക.അതിനു പുറത്തുള്ള കാര്യങ്ങളെ പരമാവധി ഒഴിവാക്കുക.ഏതൊക്കെ ഭാഗങ്ങൾ ആദ്യം പഠിക്കണം,ഏതൊക്കെ ഭാഗങ്ങൾ ഒഴിവാക്കണം എന്നിവയെല്ലാം ആദ്യം തീരുമാനിക്കുക എന്നിട്ട് അതിനുള്ളിൽ നിന്ന് പ്രവർത്തിക്കുക.

   

പഠിക്കേണ്ട വിഷയത്തെ ഘടകങ്ങൾ ആക്കി തിരിക്കുക.അതിൻറെ അടിസ്ഥാന തത്വം,അതിൽ വരുന്ന വിവിധ ഭാഗങ്ങൾ എന്നിവ എന്താണ് എന്നിവയെക്കുറിച്ചുള്ള ഒരു സിലബസ് ആദ്യം തയ്യാറാക്കുക.ഉദാഹരണമായി 3ഡി അനിമേഷനിലെ മോഡലിംഗ് ആണ് പഠിക്കാൻ ഉദ്ദേശിക്കുന്നത് എങ്കിൽ അതിൽ വരുന്ന polygon,nurbs,surface,curve,editing,surface flow തുടങ്ങിയ കാര്യങ്ങൾ മുൻഗണന ക്രമത്തിൽ തയ്യാറാക്കുക.അതിനനുസരിച്ച് മുന്നോട്ടു പോകുക.അപ്പോൾ ഇതൊക്കെ ഒരു തുടക്കകാരന് എങ്ങിനെ തിരിച്ചറിയാൻ കഴിയും എന്ന ഒരു ചോദ്യം ഉയരുന്നു.അതിനായി youtube, google, software website, blog, tutorial sites, books ഇങ്ങിനെയുള്ള എല്ലാ സംവിധാനങ്ങളും ഉപയോഗിച്ച് മനസ്സിലാക്കുക

    ഓരോ ദിവസവും ചെയ്യേണ്ട കാര്യങ്ങൾ എന്തൊക്കെ എന്ന് ആദ്യം ഒരു കുറിപ്പ് തയ്യാറാക്കുക.കൂടാതെ ഒരു കാര്യം ചെയ്യുമ്പോൾ അതിൽ മാത്രം ശ്രദ്ധ കേന്ദ്രീകരിക്കുക.അങ്ങിനെ ചെയ്യുമ്പോൾ ഒരു അടുക്കും ചിട്ടയും വരുന്നതായിരിക്കും.പയ്യെതിന്നാൽ പനയും തിന്നാം എന്ന ചൊല്ല് ഓർക്കേണ്ടതാണ്.

    ഒരുവിധം കാര്യങ്ങൾ കയ്യിലായി എന്ന് ബോധ്യപ്പെടുമ്പോൾ ഒരു ലക്ഷ്യം വയ്ക്കുക.ഒരോ ആഴ്ചയിൽ അല്ലെങ്കിൽ ഓരോ മാസത്തിൽ അല്ലെങ്കിൽ ഓരോ ദിവസത്തിൽ ഒരു വർക്ക് അല്ലെങ്കിൽ ഒരു സൃഷ്ടി എന്ന ലക്ഷ്യത്തോടെ മുന്നേറുക.പെർഫെക്ഷൻ കൊണ്ടു വരിക എന്നത് വളരെയധികെ സമയം വേണ്ടി വരുന്ന ഒരു പ്രവർത്തനമാണ്.ആയതിനാൽ ശ്രദ്ധയോടെ കാര്യങ്ങൾ മുന്നോട്ട് കൊണ്ടു പോകുക.

   

നമ്മുടെ സൃഷ്ടിക്ക വിഘാതം സൃഷ്ടിക്കുന്ന എല്ലാ പ്രവർത്തനങ്ങളിൽ നിന്നും മാറി നിൽക്കുക എന്നതാണ് മറ്റൊരു സുപ്രധാനമായ കാര്യം.അതിനായി അനാവശ്യ കാര്യങ്ങളിൽ തലയിടാതിരിക്കുക.ദൌർബല്യങ്ങളെ അവഗണിക്കുക.

    അറിവുള്ളവരുടെ അഭിപ്രായം ഉൾക്കൊള്ളുക.വിദഗ്ധരുടെ അഭിപ്രായങ്ങൾ നമ്മുടെ കുറവുകൾ തിരിച്ചറിയാനും തിരുത്തലുകൾ വരുത്തുവാനും സഹായിക്കുന്നു.വിമർശനങ്ങളെ ഉൾക്കൊണ്ട് മാറ്റം വരുത്തി മുന്നോട്ടു പോകുവാനുള്ള മനസ്സ് സ്വയം ഉണ്ടാക്കിയെടുക്കുക.എന്നാൽ എന്തിനും കുറ്റം പറയുന്നവരെയും, നിരുത്സാഹപ്പെടുത്തുന്നവരെയും ഒഴിവാക്കുക

    സ്വയം സൃഷ്ടിക്കുന്ന അന്തരീക്ഷത്തിൽ നിന്നും ആണ് പ്രവർത്തിക്കേണ്ടത് എന്ന കാര്യം സുപ്രധാനമാണ്.സ്വന്തം വിധി തീരുമാനിക്കുന്നത ്അവരവർ തന്നെ എന്ന കാര്യം എപ്പോഴും ഓർമിക്കുക.

    

ചെറിയ ചെറിയ കാര്യങ്ങൾ ആദ്യം തന്നെ ചെയ്യുക.ലളിതമായ വർക്കുകൾ ചെയ്യുമ്പോൾ തെറ്റു കുറ്റങ്ങൾ തിരിച്ചറിയുവാനും സങ്കീർണ്ണമായ വർക്കുകൾ ചെയ്യുവാനുള്ള ധൈര്യം ലഭിക്കുവാനും സഹായിക്കും.ഒരു കാര്യം തന്നെ വീണ്ടും വീണ്ടും ചെയ്യുമ്പോൾ അത് മനസ്സിൽ ഉറയ്ക്കുവാനും അതിൽ വിദഗ്ധൻ ആകുവാനും സാധിക്കും.കൂടാതെ ഒരു സമയം ഒരു കാര്യം മാത്രം ചെയ്യുവാനും ശ്രദ്ധിക്കേണ്ടതാണ്.

    മേൽപ്പറഞ്ഞ കാര്യങ്ങൾ എല്ലാം തന്നെ ഒരു വ്യക്തിയുടെ വിജയത്തിലേക്കുള്ള പാതയിൽ സഹായകരമാകും എന്നു കരുതുന്നു.അനിമേഷൻ,ആർട്ട് മേഖലകളിൽ ജന്മനാ കഴിവ് ലഭിക്കുന്ന ഒരാൾക്ക് കാര്യങ്ങൾ വളരെയധികം വേഗത്തിൽ സാധിക്കുന്നു.എങ്കിലും ഈ മേഖലയിൽ കടന്നു വരുന്ന ആർക്കും അവരുടേതായ ഒരു സ്ഥാനം കൂടി ഉണ്ട് എന്നത് പ്രാധാന്യമുള്ള ഒരു വസ്തുത ആണ്.അത് ഏതാണ് എന്ന് തിരിച്ചറിയുക എന്നതാണ് ഇവിടെ വിജയത്തിന് ആധാരം